POESIE IN DIALETTO SICILIANO di Alfredo Ossino

A SICILIA

A Sicilia e comu na macchia, ranni,
ricca 'nta ogni ramu,
e circannu senza affanni,
tutti i frutti c'attruvamu.

Nta nu ramu, c'è l'intelligenza,
lassata, pi li generazioni,
de patri nostri, di tutti li nazioni,
Greci, Romani, da Spagna e da Pruvenza.

Nta nu ramu, c'è l'astuzia umana,
e chista,... è propiu cosa siciliana.

Poi ci sunu antichità, mari, munti e paesaggi,
ca sulu a vidilli, parunu miraggi.

E vicinu a li radici di sta macchia,
c'è na terra tantu ginirusa, ca è na pacchia.

Ora, pari ca sta macchia è malata
e tutti a na decisu, ca và curata.

Però, nun si capisci quali simenza,
ha fattu crisciri u ramu di la dilinquenza.

'Nta stu ramu, crisci, a ta sapiri
'n fruttu, tantu duci d'assaggiari.

Esperti di tuttu u munnu hannu truvari,
qual'è a cura giusta d'adottari.

E mentri sunu attornu all'arvuru a studiari,
ogni tantu, unu allonga a manu pi mangiari.