logo L'angolo dell'ARTE Alfredo Ossino
Arte in Sicilia

POESIA SICILIANA di Alfredo Ossino

I SODDI

L'omu cerca i soddi 'nsichitanza
cummintu, ca sunu di grandi 'mpurtanza.

Tutta a vita li cerca cu affannu,
ma di truvalli, nun sapi mai quannu.

Quasi sempri, sta ricerca è senza fini,
ma a spiranza, ci rinasci tutti i matini.

Ogni tantu, però c'arrinesci
e picca ci manca, ca pazzu nesci.

Si n'adduna, passatu u primu mumentu,
ca sulu ora, incumincia u veru turmentu,

'Nta testa hanu aumintatu i pinseri
ca mancu a notti dormi e s'arriseri.

Pi prima cosa, pensa su a sabbari,
qual'è a megghiu cosa pi falli fruttari.

"Ora i mettu a banca e pigghiu l'interessi,
ma ca svalutazioni, co tempu su pessi!

Ora cercu di l'amici u cunsigghiu!
...Ma forsi è megghiu ca nun u pigghiu!

Forsi, spinnilli è a vera soluzioni,
... ma poi, tornu 'nta vecchia situazioni!

E su mi scippunu i dilinquenti?"
Macari stu pinseri, ci furria 'nta menti.

"Pirchì m'attruvari 'nta sta situazioni,
ca ci pensu e nun trovu a soluzioni?

Era megghiu su nun aveva nenti,
ca almenu cueta aveva a menti.

Cuntintizza i sordi mai hanu purtatu,
a cu di nicu, nun c'era abituatu.

Acchiù nun mangiu 'nta lu iornu,
e a notti nun pigghiu sonnu

Tantu a disidiratu 'sta ricchizza,
ma che pinseri a divintatu 'na munnizza".